Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Igor Popoviq, ndihmës i drejtorit të të ashtuquajturës Zyrë për Kosovën në Qeverinë e Serbisë, ka incizuar në mënyrë të fshehtë një takim zyrtar të zhvilluar më 17 shtator 2020 në Bruksel, ndërmjet përfaqësuesve serbë dhe zyrtarëve të Bashkimit Evropian. Incizimi, i realizuar për llogari të shërbimit sekret serb (BIA), është transmetuar sot në emisionin “Five” në RTV Dukagjini.
Në fillim të incizimit dëgjohet një zë që flet serbisht: “A je gati? Po… incizo”, që sugjeron nisjen e përgjimit të fshehtë. Më pas, Popoviq ftohet të prezantojë, por këtë e bën përfaqësuesja serbe me emrin Nevena. Gjatë fjalës së saj, ajo flet për çështjen e “pronave të Republikës së Serbisë” në Kosovë, duke përfshirë asetet shtetërore, ato të Kishës Ortodokse Serbe dhe të komuniteteve joshqiptare. Ajo thekson se zgjidhja kërkon “dialog politik në nivel të lartë dhe marrëveshje përfundimtare, ligjërisht të obligueshme”.
Pas prezantimit, incizimi vazhdon me biseda të lira për çështje të zakonshme si masat anti-COVID dhe oraret e punës. Në një moment dëgjohet vetë Popoviq duke thënë: “Mendoj se deshën të eksplodojnë kur e dëgjuan atë (prezantimin)”, ndërsa një bashkëbiseduese e pyet: “A ia dolët krejt ta merrni?”, dhe një tjetër shton: “E aktivizuam”. Sipas tij, “gjatë atyre dhjetë minutave” është incizuar i gjithë takimi.
Igor Popoviq është arrestuar nga autoritetet e Kosovës dhe ndodhet nën hetim për veprën penale “nxitje e përçarjes dhe mosdurimit”. Gjykata Themelore në Prishtinë i ka caktuar masën e paraburgimit prej një muaji.
Ky incident ngre shqetësime serioze mbi përfshirjen e shërbimeve sekrete serbe në proceset diplomatike dhe përbën shkelje flagrante të etikës dhe sigurisë ndërkombëtare në takime zyrtare.
