Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Shtëpia botuese, “Faik Konica”, në Prishtinë ka nxjerrë në dritë librin: “Shpërngulja e Çamëve në shekuj” vepër e veprimtarit të arsimit, mësuesit, shkrimtarit e publicistit, Tafil Morina.
Autori, në këtë vepër ka sjellë fakte e dëshmi të shumta të jetës së shqiptarëve në Greqi e veçmas në trojet e Çamërisë gjatë shekujve të kaluar e deri në ditët tona.
Studiuesi, Tafil Morina, ka hulumtuar një literaturë të begatshme shkencore lidhur me Çamërinë, ngritjet dhe pësimet e saj gjatë shekujve, deri në fundin fatal e tragjik të popullatës çame e cila në sy të të gjitha shteteve të civilizuara të Evropës e më gjerë u lejua të kthehet në një golgotë të cilën nuk e njeh historia.
Fati i tërë një populli u vulos vetëm për shkak të etnisë dhe fesë së tyre, meqë ata nuk treguan gatishmëri të ndërrojnë gjuhë, komb e fe, andaj e dhe regjimet greke që nga themelimi i shtetit të parë grek në vitin 1822, e ndoqën dhe e masakruan, veçmas popullatën çame, ndërsa regjimi fashist grek, me Napoleon Zervën në krye kreu masakrat më të çmeritura e më barbare mbi këtë popullatë duke e dëbuar nga trojet e veta etnike duke e shfarosur në mënyrë masive.
Autori ka përshkruar shtrirjen gjeografike të çamëve, vendet ku ata kanë jetuar gjatë shekujve, dëbimet nga trojet e tyre etnike, ndërrimin e çamëve me grekët e Edrenesë, dëbimin e dhunshëm në Shqipëri, shkatërrimin e përvetësimin e pronave të tyre dhe spastrimin etnik të tipit fashist.
Libri: “Shpërngulja e çamëve në shekuj” ka 78 faqe, Botoi “Faik Konica”, në Prishtinë.
