Grupi i parë i të burgosurve danezë pritet të transferohet në Kosovë në pranverën e vitit 2027

Grupi i parë i të burgosurve nga Danimarka pritet të arrijë në Kosovë pas dy vitesh, ku do të vendosen në burgun e qytetit të Gjilanit, njofton Drejtori i Përgjithshëm i Shërbimit Korrektues të Kosovës, Ismail Dibrani. Ky transferim bëhet në kuadër të një marrëveshjeje dhjetëvjeçare mes Kosovës dhe Danimarkës, e cila parashikon që deri në 300 të burgosur danezë të shfrytëzojnë kapacitetet e Institucionit Korrektues në Gjilan. Marrëveshja u ratifikua nga Kuvendi i Kosovës më 23 maj 2024, dy vjet pas nënshkrimit të saj. Dibrani thekson se Kosova duhet të përmbushë standardet daneze për infrastrukturën dhe trajnimin e stafit korrektues, për të cilat po priten kërkesa të reja nga pala daneze. Në ndërkohë, nga Komiteti për Mbrojtjen e të Drejtave të Njeriut dhe Lirive Themelore, ka pasur reagime, duke shprehur shqetësim për përbërjen e të dënuarve, që sipas tyre janë kryesisht persona nga Afrika, dhe duke kritikuar marrëveshjen si një “shitje” të Kosovës për çmime të ulëta.