Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Më 14 qershor të vitit 1998, në një ndër betejat më të rëndësishme të Luftës Çlirimtare, luftëtarët e fshatrave Krojmir, Pjetërshticë, Shalë, Carralevë, Zborc dhe fshatra të tjera përreth arritën të zënë Grykën strategjike të Carralevës, duke i shkaktuar humbje të konsiderueshme forcave policore serbe që vepronin nga drejtimi i Shtimes. Pas një përballjeje që zgjati mbi katër orë, forcat serbe u detyruan të tërhiqen, ndërsa Gryka e Carralevës mbeti e kontrolluar nga Ushtria Çlirimtare e Kosovës deri në ofensivën e rëndë serbe të 25 dhe 26 korrikut të atij viti. Saktësisht një vit më pas, më 14 qershor të vitit 1999, reporterët e Radios-Kosova e Lirë raportuan për krimet e fundit të forcave serbe gjatë tërheqjes nga territori i Kosovës. Ushtarë dhe policë serbë, përveç plaçkitjes së shtëpive të shqiptarëve, po digjnin shtëpitë për të humbur gjurmët e krimeve të kryera. Për më tepër, gjatë kësaj tërheqjeje, ata kishin marrë me vete edhe pjesëtarë të popullatës civile, të cilët më parë i kishin mbajtur të izoluar apo në burgje të përkohshme.
