Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kandidati për kryeministër nga Partia Demokratike e Kosovës, Bedri Hamza, ka deklaruar në Konventën e Përgjithshme të 11-të të partisë se PDK është sot forca që orienton Kosovën drejt zhvillimit të qëndrueshëm, drejt Evropës dhe drejt bashkimit të shoqërisë. Hamza tha se në zgjedhjet e 9 shkurtit, PDK arriti rezultat më të mirë sepse nuk u përfshi në retorika përçarëse, por ofroi program të qartë, zgjidhje konkrete dhe mirëqenie për qytetarët. “I bashkuam qytetarët rreth programit tonë. Këtë po e bëjmë edhe sot, me vazhdimin e besimit për kryetarin Memli Krasniqi dhe strukturat e reja të partisë. Këtë duhet ta bëjmë edhe më 12 tetor në çdo komunë të Kosovës,” tha Hamza. Ai u shpreh se PDK është trashëgimtare e atyre që nuk u përkulën kurrë – si Hashim Thaçi e Kadri Veseli – dhe se partia ka lindur në sakrificë e përballje, jo në zyrat e qeta parlamentare. “PDK është thirrur të jetë zëri i atyre që nuk mund të flasin lirisht sot, dhe ta mbrojë trashëgiminë e luftës sonë çlirimtare. Ne nuk kërkojmë lavdi personale, por duam që fëmijët tanë të ndërtojnë të ardhmen në Kosovë, jo jashtë saj”, theksoi Hamza mes entuziazmit të delegatëve të konventës.
