Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Në zemrën e kazanit të KEK-ut, aty ku nxehtësia nuk matet me termometër por me frymëmarrje, Gëzim Selmanaj, një punëtor me përkushtim dhe ndershmëri, përditë mban në jetë një sistem që ndriçon shtëpitë tona – shpesh me koston e shëndetit të tij. Në një rrëfim të ndjerë, ai përshkruan realitetin e punës në kushte të rënda, pa pajisje të përshtatshme mbrojtëse dhe me rrezikshmëri të lartë. “Rrobat që na shqyhen janë pasojë e ngushticës së hekurt. Por më keq është ajri që thithim. Maskat janë ato të kohës së Covid-it, jo maska profesionale me ventilim. Rrezikshmëria është e përditshme, por unë vij me përkushtim, sepse e dua punën time”, thotë Selmanaj. Ai i bën thirrje Bordit të KEK-ut që të investojë në kushte më të mira pune, pa përfshirje politike, duke theksuar se krenaria për të qenë pjesë e KEK-ut nuk mjafton kur mungon siguria. “Me 800 euro dhe 6 anëtarë familje, nuk e quaj luks. Po e bëj punën me vullnet, por duam kushte. Të largohet ideja se punëtori i KEK-ut ka privilegje. Ne kemi vuajtje, sfida, rrezik”, përfundon ai. Ky rrëfim prekës i Gëzimit është pasqyra e shumë punëtorëve të tjerë që çdo ditë përballen me sfida të mëdha për të mbajtur ndriçimin në çdo shtëpi. Ata janë heronjtë e padukshëm të sistemit energjetik të Kosovës.
