OVL e UÇK-së – dega Ferizaj: Dëshmorët e Kombit janë udhërrëfyesit tanë të përjetshëm

Sot, së bashku me familjarë, bashkëluftëtarë, ish të burgosur politik, invalidë e veteranë të UÇK-së, OVL-UÇK – dega Ferizaj mbajti homazhe në nderim të jetës dhe veprës së Dëshmorit të Kombit Bilall Shala, në ditën e rënies së tij heroike.

Me përulje para varrit të tij, ne rikujtuam sakrificën, qëndresën dhe besën e dhënë për liri, duke nderuar jo vetëm Bilall Shalën, por të gjithë Dëshmorët e Kombit që u flijuan për atdhe.

Dëshmori i Kombit, Bilall A. Shala (1950–1998)

I lindur në fshatin Ngucat të Komunës së Malishevës, Bilall Shala ishte shembull i gjallë i shqiptarisë dhe përkushtimit ndaj kombit. Ai u rrit dhe u formua me dashurinë për atdhe, duke u bërë një figurë e dalluar e rezistencës sonë çlirimtare.

Gjatë luftës së Ushtrisë Çlirimtare të Kosovës ishte pjesëtar i Brigadës 121, ku dha kontribut të çmuar në radhët e saj. Më vonë, me detyrë të caktuar, erdhi në Ferizaj për të vazhduar aktivitetin e tij atdhetar. Por aty u hetua nga okupatori serb dhe tradhtarët e kombit. Pas arrestimit, ra në duart e gjakatarëve serbë, të cilët e masakruan barbarisht. Edhe pse i nënshtrohet torturave çnjerëzore, nga goja e Bilallit nuk doli asnjë fjalë që do të cenonte shokët e luftës apo idealin e tij.

Bilall Shala mbeti shembull i sakrificës dhe i qëndresës deri në frymën e fundit. Jeta dhe vdekja e tij janë dëshmi e pathyeshmërisë dhe dashurisë së pakufishme për lirinë e Kosovës. Shembulli i tij do të mbetet përjetë udhërrëfyes për brezat që vijnë, duke i mësuar ata se liria fitohet me gjak, sakrificë dhe besë ndaj atdheut.

Lavdi e përjetshme jetës dhe veprës së Dëshmorit të Kombit, Bilall Shala!

Lavdi të gjithë Dëshmorëve të Kombit!