Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Analisti i KDI-së, Eugen Cakolli, ka reaguar lidhur me zhvillimet e fundit në Kuvendin e Kosovës, duke e cilësuar si të rrezikshme tendencën për ta konsideruar të konstituar edhe pa zgjedhjen e pesë nënkryetarëve. Një interpretim i tillë jo vetëm që bie ndesh me frymën kushtetuese, por rrezikon të krijojë precedent ku çdo grup parlamentar me të drejtë propozimi do të kishte fuqi bllokuesi mbi funksionalitetin e institucionit. “Pozitat e rezervuara nuk janë privilegje absolute. Ato janë pjesë e një arkitekture kushtetuese të krijuar për gjithë përfshirje, por pa cenuar funksionimin institucional. Refuzimi për të pranuar kandidatin e propozuar nga shumica e deputetëve serbë nuk është akt i mbrojtjes së interesave shtetërore, por një keqinterpretim i frymës kushtetuese që rrezikon të prodhojë pasoja të rënda”, ka shkruar Cakolli. Ai shton se situata e tanishme nuk lidhet me bojkot nga pakicat, por me refuzim të shumicës shqiptare, veçanërisht nga Lëvizja Vetëvendosje, çka sipas tij, i shërben Listës Serbe që të paraqitet si palë e dëmtuar, duke fituar terren edhe në diskursin ndërkombëtar. Në përfundim, Cakolli paralajmëron se pavarësisht nëse kjo është strategji politike apo mungesë vizioni shtet formues, rezultati është i njëjtë: “Me penalltitë dhe autogolat tona, po i servojmë Listës Serbe fitoren në tavolinë.”
