Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Deputeti i Partisë Demokratike të Kosovës, Rashit Qalaj, ka hedhur dyshime të forta për mundësinë e krijimit të një Qeverie të re nën udhëheqjen e Albin Kurtit. Sipas tij, zhvillimet e fundit në Kuvend kanë treguar qartë se nuk ekziston shumica e nevojshme parlamentare për të formuar një kabinet të ri qeveritar. Në një intervistë televizive, Qalaj u shpreh se tentativat për një “Qeveri Kurti 3” do të dështojnë, pasi numrat nuk janë në favor të Vetëvendosjes. Ai tha se situata aktuale politike është e tillë që vendi nuk ka rrugëdalje tjetër përveç zgjedhjeve të përgjithshme të parakohshme. “Duke marrë parasysh zhvillimet në Kuvend dhe forcën e numrave, nuk besoj se do të ketë Qeveri Kurti 3. Realisht jemi në një pozicion që më shumë na shpie në zgjedhjet e përgjithshme. Tentativat për krijimin e një qeverie të tillë nuk do të kenë rezultat”, u shpreh Qalaj. Ai theksoi se Kosova ndodhet në një situatë të ngërçit institucional, ku mosmarrëveshjet politike dhe mungesa e konsensusit po e pamundësojnë funksionimin normal të institucioneve. Sipas tij, zgjedhjet e parakohshme janë zgjidhja e vetme për të kthyer stabilitetin politik dhe besimin e qytetarëve te proceset demokratike.
