Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Komandanti i Forcës së Sigurisë së Kosovës, gjenerallejtënant Bashkim Jashari, ka pritur në takim lamtumirës zëvendëskomandantin e KFOR-it, gjeneral brigade Cahit Irican, me rastin e përfundimit të mandatit të tij në Kosovë. Gjatë takimit, të dy gjeneralët kanë vlerësuar lart bashkëpunimin e vazhdueshëm ndërmjet FSK-së dhe misionit të KFOR-it, duke e konsideruar atë si një nga shtyllat kryesore të sigurisë dhe stabilitetit në Kosovë dhe në rajon. Ata diskutuan mbi arritjet e përbashkëta në fushën e trajnimeve, ngritjes së kapaciteteve mbrojtëse, si dhe koordinimin në operacionet e ndihmës civile dhe reagimit ndaj krizave. Gjenerallejtënant Jashari shprehu mirënjohjen e tij për kontributin profesional dhe bashkëpunues të gjeneralit Irican gjatë mandatit në Kosovë, duke theksuar rolin e rëndësishëm të KFOR-it në garantimin e paqes dhe sigurisë. “Në emër të Forcës së Sigurisë së Kosovës dhe të gjithë pjesëtarëve të saj, falënderoj gjeneralin Irican për përkushtimin dhe mbështetjen ndaj institucioneve tona të sigurisë. I uroj suksese të mëtejshme në karrierën e tij ushtarake”, deklaroi Jashari. Në fund të takimit, dy komandantët riafirmuan rëndësinë e partneritetit ndërmjet FSK-së dhe KFOR-it, si një garanci e qëndrueshme për paqe dhe bashkëpunim ndërkombëtar në shërbim të sigurisë rajonale.
