Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ish-ministri i Punëve të Jashtme të Kosovës, Enver Hoxhaj, ka përshëndetur vendimin e Republikës Arabe të Sirisë për të njohur zyrtarisht pavarësinë e Kosovës, duke e cilësuar atë si një zhvillim të rëndësishëm diplomatik dhe politik për vendin. Në një reagim publik, Hoxhaj kujtoi angazhimin e tij të hershëm në mbështetje të opozitës siriane kundër regjimit të Bashar al-Asadit. “Që nga 15 marsi 2011 kam mbështetur opozitën siriane për ta larguar regjimin brutal të Asadit. Më 26 prill 2012 pritëm në zyrën time në Ministrinë e Punëve të Jashtme të Kosovës opozitën siriane. Kam mbështetur luftën e tyre dhe kam bërë thirrje për ndërhyrje ushtarake, duke publikuar analiza edhe në Foreign Policy,” ka shkruar Hoxhaj. Ai përmendi gjithashtu pjesëmarrjen në takimet e “Miqve të Sirisë” që nga viti 2012 në Paris, si dhe kontaktet me ministrat e qeverisë së re siriane pas rrëzimit të regjimit të Asadit në pranverën e vitit 2025. “I gëzohem këtij lajmi, ashtu siç i gëzohen shqiptarët që jetojnë në Ballkan, por edhe ata në Damask e në Siri. Kjo është një fitore për Kosovën dhe për drejtësinë ndërkombëtare,” theksoi ai. Sipas Hoxhajt, njohja nga Siria dëshmon se diplomacia e Kosovës duhet të vazhdojë të mbështesë kauzat e drejta ndërkombëtare dhe të forcojë miqësitë e reja që ndihmojnë në afirmimin global të shtetit të Kosovës.
