Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Njohësi i çështjeve politike, Ilir Ibrahimi, ka komentuar dëshminë e ish-zyrtarit amerikan Christopher Hill në Gjykatën Speciale në Hagë, duke theksuar ndikimin e rolit të Shteteve të Bashkuara gjatë viteve 1998-1999 në Kosovë. Sipas Ibrahimit, dëshmitë e ish-zyrtarëve amerikanë po tregojnë qartë përfshirjen e administratës amerikane dhe mbështetjen institucionale që ka dhënë gjatë intervenimit në Kosovë. Ai ka vënë në dukje se pjesëmarrja e përfaqësuesve të Ambasadës së SHBA-së në seancat gjyqësore është dëshmi e drejtpërdrejtë e kësaj përkrahjeje. “Administrata amerikane ka luajtur një rol kyç në zhvillimet e asaj periudhe dhe edhe sot qëndron fuqishëm pas asaj përfshirjeje dhe qëndrimi politik,” ka shkruar Ibrahimi. Ai shton se sfidimi i pikave kryesore të aktakuzës forcon faktin se lufta e UÇK-së ishte e drejtë, ndërsa pretendimet e prokurorisë janë të pabazuara. Ibrahimi thekson se, nëse gjykata vendos për dënimin e disa udhëheqësve të UÇK-së, kjo do të nënkuptonte jo vetëm dënimin e vetë UÇK-së, por edhe të aleatit të saj kryesor, Shteteve të Bashkuara të Amerikës.
