Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Anëtari i kryesisë së AAK-së, Besnik Tahiri, ka reaguar ndaj akuzave të Lëvizjes Vetëvendosje, e cila ka insinuar se ish-partitë opozitare, përfshirë AAK-në, kanë lidhje të tërthorta me Millan Radoiçiqin – i akuzuar për sulmin terrorist në Banjskë më 24 shtator 2023, ku mbeti i vrarë rreshteri i Policisë së Kosovës, Afrim Bunjaku. Tahiri i quajti të pavërteta dhe të papranueshme akuzat që, sipas tij, synojnë të njollosin figurën e liderit të AAK-së, Ramush Haradinaj. Duke theksuar historinë e Haradinajt në luftë, Tahiri tha se “nuk ka asnjë krahasim moral” midis atyre që kanë luftuar për vendin dhe akuzave që po bëhen sot nga VV-ja. “Ramush Haradinaj i ka 7 ose 8 plagë në trup nga granatat. As vetë s’e di sa i ka. Veç në skaner që i sheh njeri në trup të vet sa herë ndërron koha”, deklaroi Tahiri. Ai shtoi se këto akuza janë sulme politike që synojnë të devijojnë nga dështimet e qeverisë dhe se përpjekjet për ta lidhur Haradinajn me struktura kriminale serbe janë “nën nivelin e çdo debati politik serioz”. Debatet e ditëve të fundit janë ashpërsuar pas përplasjes mes VV-së dhe partive opozitare, të cilat e kanë akuzuar qeverinë për tentim të manipulimit të opinionit publik për qëllime elektorale.
