Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Në një seancë dëgjimore të Komitetit për Punë të Jashtme të Dhomës së Përfaqësuesve të Shteteve të Bashkuara, kongresisti Keith Self pyeti ekspertët mbi qasjen e kryeministrit të Kosovës, Albin Kurti, duke u fokusuar në zhvillimet politike në Ballkanin Perëndimor. Tre ekspertë të ftuar për përgjigje, profesori Edward P. Joseph dhe analistët Lule Coffey dhe Max Primorac, konfirmuan se veprimet e Kurtit mund të konsiderohen obstruksioniste. Joseph tha qartë: “Po”, Coffey përgjigj “Më shumë po se jo”, ndërsa Primorac konfirmoi gjithashtu “Po”. Seanca kishte për qëllim shqyrtimin e situatës së stabilitetit në rajon, me fokus të veçantë në Kosovë, Serbi dhe Bosnjë e Hercegovinë. Kongresisti Self vuri theksin tek nevoja për një balancë të qëndrueshme rajonale dhe roli i SHBA-së në garantimin e paqes dhe prosperitetit për qytetarët e Ballkanit. Eksperti Joseph nënvizoi sfidat në Kosovë dhe Serbi, duke theksuar se rajoni mbetet i paqëndrueshëm për shkak të mungesës së përmbushjes së rekomandimeve ndërkombëtare nga Serbia dhe rolit të aktorëve lokalë. Ai shtoi se një angazhim euroatlantik i Serbisë do të parandalonte manipulimin e partnerëve perëndimorë dhe do të kontribuonte në stabilitetin rajonal. Dëgjimi u zhvillua në një kontekst ku SHBA dhe NATO mbeten të pranishme për të mbështetur paqen, por shqetësimet lidhur me vonesat në implementimin e marrëveshjeve dhe ndikimin e veprimeve obstruksioniste të qeverisë së Kosovës mbeten të larta.
