Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryetari i OVL të UÇK-së, Hysni Gucati, ka hedhur kritika të ashpra ndaj Gjykatës Speciale dhe qeverisë në detyrë të Kosovës gjatë ceremonisë së varrimit të babait të Salih Mustafës – Calit. Gucati u shpreh se Gjykata Speciale është shumë e dëmshme për vendin dhe e kritikoi për moslejimin e Calit të merrte pjesë në varrimin e babait të tij, pavarësisht se kërkesa e mbrojtjes ishte paraqitur për një vizitë humanitare. “Cali është i dënuar padrejtësisht me 15 vjet burgim, me dëshmitarë të rrejshëm dhe dosje të falsifikuara,” tha Gucati. Ai kritikoi edhe qeverinë në detyrë të Kosovës, të cilën e quajti “qeveri të turpit”, për mungesën e ndërhyrjes për të siguruar të drejtën e Calit për të marrë pjesë në ceremoninë mortore. “Dhashtë Zoti të mos vijë më në pushtet, sepse nuk u interesua për qytetarët e vet,” tha Gucati, duke shtuar se shteti ka dështuar në përfaqësimin e qytetarëve në këtë rast. Gucati theksoi se mbrojtja e Calit kishte bërë kërkesë që ai të lirohej për katër orë për të marrë pjesë në varrim, por nuk kishte marrë përgjigje. Ai e krahasoi Gjykatën Speciale me institucione të ish-Jugosllavisë dhe vendet e tjera jashtë Evropës, duke deklaruar se “kjo nuk është gjykatë e Evropës, këtu s’ka fare drejtësi”. Reagimi i Gucatit vjen në një kohë kur tensionet rreth funksionimit të Gjykatës Speciale dhe trajtimit të ish-krerëve të UÇK-së vazhdojnë të jenë të larta, duke nxitur debate mbi pavarësinë e institucioneve dhe mbrojtjen e të drejtave të qytetarëve kosovarë.
