Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Organizata e Veteranëve të Luftës së UÇK-së, ka reaguar ashpër pasi përfaqësuesit e kategorive të dala nga lufta nuk janë ftuar në seancën solemne të Kuvendi i Republikës së Kosovës, e cila iu kushtua përkujtimit të Epopesë së UÇK-së. Në reagimin publik, OVL-UÇK e ka cilësuar këtë veprim si të papranueshëm dhe thellësisht fyes për luftëtarët, familjet e dëshmorëve dhe invalidët e luftës, duke theksuar se pikërisht ata që sakrifikuan për lirinë e vendit u lanë jashtë një ceremonie që i kushtohet historisë së tyre. Sipas kësaj organizate, është paradoksale që brenda sallës së Kuvendit të flitet për lavdinë e Ushtria Çlirimtare e Kosovës, ndërsa jashtë saj të mbeten njerëzit që, sipas tyre, e krijuan atë histori me gjakun dhe sakrificën e tyre. “Është e papranueshme dhe thellësisht fyese që në një seancë solemne të Kuvendit të Republikës së Kosovës kushtuar ‘Epopesë së UÇK-së’, të mos ftohen fare përfaqësuesit e kategorive të dala nga lufta. Pikërisht ata burra e gra që me pushkë në dorë ngritën dhe mbrojtën idealin e lirisë sot u lanë jashtë një ceremonie që i kushtohet sakrificës së tyre”, thuhet në reagim. OVL-UÇK thekson se kategoritë e dala nga lufta nuk kërkojnë privilegje, por respektin institucional që u takon, duke shtuar se historia e luftës çlirimtare nuk mund të kujtohet duke përjashtuar ata që e bënë atë histori.
