Në Qendrën e Kulturës “Hasan Prishtina” në Skenderaj, në prezencën e Kryetarit të Komunës Sami Lushtaku, zyrtarëve komunalë dhe deputetëve të Parlamentit, u mbajt promovimi i librit “Nana Salë” të autores Bediha Emini, një vepër që sjell kujtimin dhe rrëfimin për sakrificën, qëndrueshmërinë dhe forcën e një nëne në periudhat më të vështira të jetës familjare.
Aktiviteti u hap me një fjalë rasti nga Drejtoresha për Kulturë, Rini dhe Sport, Kosovare Ahmeti, e cila theksoi rëndësinë e promovimit të veprave që ruajnë kujtesën dhe vlerat njerëzore në komunitetin tonë.
Më pas, Arben Dashefci foli për procesin e botimit të librit dhe përkushtimin për ta sjellë këtë histori para lexuesve, duke vlerësuar mesazhin dhe domethënien që përcjell vepra.
Pas tij, me një fjalë rasti u drejtua edhe Deputetja e Parlamentit të Republikës së Kosovës, Sala Jashari, e cila vlerësoi këtë iniciativë kulturore dhe rëndësinë e ruajtjes së historive që pasqyrojnë sakrificën, forcën dhe qëndrueshmërinë e grave dhe familjeve tona ndër vite.
Në fund, autorja Bediha Emini ndau emocionet dhe motivimin që qëndron pas këtij libri, duke kujtuar figurën e “Nanës Salë”, sakrificat e saj dhe qëndrimin stoik gjatë periudhës më të vështirë të jetës së saj me familjen.
Ky promovim ishte një moment reflektimi dhe vlerësimi për forcën, durimin dhe shembullin që lënë pas figurat e tilla në shoqërinë tonë.
Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
