Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
E ardhmja e pranisë ushtarake amerikane në Kosovë po hyn në një fazë të re diskutimi, ndërsa Shtetet e Bashkuara po rishikojnë angazhimin e tyre ushtarak në Evropë dhe NATO-ja ka nisur riorganizimin e misionit paqeruajtës në Kosovë. Sipas raportimit të Radios Evropa e Lirë, aktualisht rreth 590 ushtarë amerikanë shërbejnë në Kosovë, në kuadër të KFOR-it. Megjithatë, ende nuk ka një vendim të konfirmuar për zvogëlimin e mëtejshëm të këtij kontingjenti. Shqetësimet janë shtuar pas ndryshimeve në strukturën komanduese të forcave amerikane në kampin Bondsteel. Më 12 tetor, njësitë aktive të Ushtrisë amerikane morën nga Garda Kombëtare e Floridës drejtimin e Komandës Rajonale Lindje të KFOR-it, për herë të parë pas më shumë se një dekade. Ushtria amerikane e ka arsyetuar këtë rotacion me disponueshmërinë e forcave dhe nevojat e misionit, por nuk ka sqaruar nëse ai do të ndikojë në numrin e ushtarëve, kapacitetet apo përgjegjësitë amerikane në Kosovë. Ky koncept synon që vendet evropiane të marrin përgjegjësi më të mëdha për mbrojtjen e kontinentit. Ekspertët vlerësojnë se çështja nuk lidhet vetëm me numrin e ushtarëve, por edhe me rëndësinë politike dhe strategjike të pranisë amerikane në Kosovë. Sipas tyre, largimi i plotë i forcave amerikane mund të interpretohej në rajon si dobësim i angazhimit të Uashingtonit për sigurinë e Kosovës.
