Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Qindra zyrtarë të Policia e Kosovës kanë mbetur në pritje të realizimit të së drejtës për shtesë në pagë, duke iu drejtuar gjykatave pas uljes së shtesës së përvojës së punës nga 0.50 në 0.25 për qind. Megjithatë, sipas informacioneve të siguruara nga Tëvë1, këto lëndë aktualisht nuk po trajtohen, pasi sistemi gjyqësor është në pritje të funksionalizimit të Gjykata Administrative e Kosovës. Një zyrtar policor, në kushte anonimiteti, ka deklaruar se vonesat në vendimmarrje kanë shkaktuar dëme financiare për punonjësit që nga viti 2024, kur edhe janë detyruar të nisin procedurat ligjore për realizimin e kësaj të drejte. Ndërkohë, ish-drejtori i Policisë dhe tash avokat, Reshat Maliqi, i cili përfaqëson disa prej policëve, ka theksuar se këto raste do të duhej të trajtoheshin me prioritet, sidomos duke pasur parasysh se bëhet fjalë për të drejta të garantuara. Ai rikujtoi se Gjykata Kushtetuese e Kosovës ka rekomanduar rikthimin e dispozitës ligjore përkatëse, duke e cilësuar këtë të drejtë si të fituar dhe obligative për institucionet. Shqetësime për vonesat kanë shprehur edhe nga Sindikata e Policisë së Kosovës, duke theksuar se ulja e shtesës nuk është pranuar që nga fillimi dhe se zvarritja e proceseve gjyqësore po i dëmton punonjësit, por edhe buxhetin e policisë për shkak të kostove shtesë. Ndërkohë, Këshilli Gjyqësor i Kosovës ka njoftuar se Gjykata Administrative e Kosovës do të fillojë punën më 5 maj 2026.
