Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Shumica e partive politike në Kosovë janë përafruar rreth datës 7 qershor për mbajtjen e zgjedhjeve të reja të parakohshme parlamentare, pas një takimi konsultativ të thirrur nga ushtruesja e detyrës së presidentit, Albulena Haxhiu. Në këtë takim, përfaqësuesit e subjekteve politike diskutuan dy opsione, 31 majin dhe 7 qershorin por sipas deklarimeve pas mbledhjes, mbështetja më e madhe ishte për datën e dytë. Kreu i PDK-së, Bedri Hamza, tha se shumica e partive të pranishme u deklaruan në favor të 7 qershorit, duke theksuar rëndësinë e përgatitjeve të plota zgjedhore dhe rolit të Komisioni Qendror i Zgjedhjeve në këtë proces. Edhe Jehona Lushaku nga LDK, konfirmoi mbështetjen për këtë datë, duke nënvizuar se kërkesa e KQZ-së për më shumë kohë organizative ka qenë faktor kyç në këtë qëndrim. Nga ana tjetër, Ardian Gjini i AAK-së, deklaroi se ekziston “pothuajse konsensus i plotë” mes partive për 7 qershorin, pavarësisht mungesës së preferencave të forta fillestare. Sipas procedurave ligjore, zgjedhjet duhet të mbahen brenda 45 ditëve nga shpërndarja e Kuvendit, duke lënë në dispozicion vetëm dy data të mundshme. Pas konsultimeve të fundit, pritet që vendimi përfundimtar të formalizohet nga Haxhiu brenda ditëve në vijim.
