Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Opinionisti politik Bedri Halimi ka reaguar ndaj deklaratës së ministres serbe Snezhana Paunoviç, e cila tha se, po të kishte qenë në vendin e Sllobodan Millosheviqit në vitin 1998, do ta kishte “spastruar etnikisht Kosovën”, duke e cilësuar këtë si një alarm serioz për shqiptarët dhe institucionet e Kosovës. Sipas Halimit, shqetësues nuk është vetëm deklarimi i ministres serbe, por edhe fakti se ajo gjeti mbështetje politike nga figura të rëndësishme të pushtetit në Serbi. Ai vlerëson se kjo e zhvendos çështjen nga një deklaratë individuale në një sinjal politik që nuk duhet neglizhuar. Halimi thekson se përgjigjja e shqiptarëve nuk duhet të jetë urrejtja apo reagimi emocional, por reflektimi dhe forcimi i shtetit. Ai argumenton se historia ka dëshmuar se asnjë popull nuk mund të mbështetet vetëm te garancitë e të tjerëve, por duhet të ndërtojë institucione të forta, unitet dhe partneritete të qëndrueshme. Ai kritikon përçarjet politike në Kosovë, duke theksuar se energjia e vendit vazhdon të shpenzohet në konflikte partiake, ndërkohë që sfidat e jashtme kërkojnë bashkëpunim dhe funksionim normal institucional. “Pluralizmi prodhon ide, ndërsa përçarja prodhon dobësi. Një shtet nuk mbrohet vetëm në kufi, por edhe në parlament dhe në institucionet që funksionojnë,” thekson Halimi. Deklarata e ministres serbe duhet të shërbejë si një kujtesë se siguria e Kosovës nuk mbështetet vetëm te aleatët dhe e drejta ndërkombëtare, por edhe te pjekuria e klasës politike për ta vendosur interesin shtetëror mbi interesat partiake.
