Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Deputeti Daut Haradinaj ka deklaruar se ekziston një incizim rreth dyorësh, në të cilin, sipas tij, Fatmir Sheholli raporton në ish-shërbimin sekret jugosllav, UDB, në Beograd, kundër tij dhe ish-presidentit Hashim Thaçi. Këto deklarata Haradinaj i bëri në emisionin “Jehona Politike”, ku foli edhe për informacione anonime që, sipas tij, u dërgohen deputetëve, zyrtarëve dhe personave të tjerë, shpesh të shoqëruara me materiale që ai i cilësoi si prova të prekshme. “Për shembull, përmendët Shehollin. Ekziston një incizim dy orë, ky duke raportuar në UDB në Beograd kundër Hashim Thaçit e Daut Haradinajt para katër viteve. Ekziston ai incizim dhe nuk e nxjerrin në publik”, ka deklaruar Haradinaj. Ai tha se mesazhe dhe informacione të ngjashme, sipas tij, u dërgohen në mënyrë anonime edhe shumë deputetëve e zyrtarëve të tjerë, ndërsa theksoi se në rastet kur këto shoqërohen me prova, bëhet fjalë për materiale që duhet të trajtohen nga institucionet kompetente. “Ka sende që nuk duhet me i zbuluar. Ka sende që duhet me ia dhënë AKI-së, ka sende që duhet me ia dhënë prokurorisë. Institucionet përkatëse duhet t’i kryejnë detyrat e tyre”, është shprehur ai. Haradinaj ka vlerësuar se institucionet e sigurisë kanë rol kyç në trajtimin e informacioneve të tilla, duke përmendur Policinë e Kosovës, Agjencinë e Kosovës për Inteligjencë dhe ushtrinë si shtylla të rëndësishme të shtetit. Në këtë kontekst, ai ka thënë se e konsideron të natyrshëm bashkëpunimin e institucioneve të inteligjencës së Kosovës me shërbime të tjera inteligjence.
