Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryeministri i Republikës së Kosovës, Isa Mustafa, mori pjesë në ceremoninë e inaugurimit të Kullës Muze të ndërtuar për nder të dëshmorit, Ismet Rrahmani. Në inaugurimin e Kullës, ishin të pranishëm po ashtu ministra të kabinetit qeveritar, deputetë, përfaqësues të Komunës së Skenderajt, veteranë të luftës, familjarë dhe bashkëluftëtarë të dëshmorit. Mustafa, vlerësoi lartë figurën dhe kontributin e Ismet Rrahmanit dhe dëshmorëve të tjerë të Kosovës, duke theksuar se veprat e tyre do të mbesin përherë pjesë e kujtesës historike dhe burim frymëzimi për të ardhmen tonë. “Kontributi dhe angazhimi i tij i pandalshëm për Kosovën, janë shtytje për ne, që të punojmë me përkushtim dhe të realizojmë në plotëni veprën e heronjve tanë. Përurimi i Kullës Muze, ku ra dëshmor Ismeti, është dëshmi se historia e këtyre burrave po përjetësohet”, tha kryeministri. Pas fjalimeve nga të pranishmit, kryeministri Mustafa bashkë ministrin e Kulturës, Rinisë dhe Sportit, Kujtim Shala, nënkryetarin e Komunës së Skenderajt, Fadil Nura, nëna dhe vëllai i dëshmorit, bënë prerjen e shiritit të Kullës së dëshmorit Ismet Rrahmani. “Për mua është nder i veçantë që ndodhem bashkë me ju, në Açarevë të Drenicës, në vendlindjen që lindi dhe rriti një figurë të shquar të historisë më të re të Kosovës, siç është ajo e Ismet Rrahmanit, që Kosovës i dha shumë, duke kontribuar për lirinë dhe pavarësinë e saj përgjatë gjithë jetës së tij”, tha ndër të tjera Mustafa.
