Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Me rastin e 10 vjetorit të Pavarësisë së Kosovës, komandanti i FSK-së, gjenerallejtënant Rrahman Rama ka pranuar një letër urimi, nga shefi i Shtabit të Forcave të Armatosura të Republikës së Shqipërisë gjeneral brigade Bardhyl Kollçaku. Në letër, shefi i Shtabit të Përgjithshëm të FA të Shqipërisë, shprehet. ,,Me rastin e 10 vjetorit të Pavarësisë së Kosovës, më lejoni që në emrin e Forcave të Armatosura të Republikës së Shqipërisë, por edhe në emrin tim personal, t’ju përcjell urimet më të sinqerta e të përzemërta.
Ky përvjetor, shënon një datë jubilare jo vetëm për popullin e Kosovës, por për të gjithë shqiptarët kudo që ndodhen. Në këto dhjetë vite, jo vetëm janë hedhur themelet e forta të shtetit të Kosovës, por hapat e bëra për konsolidimin dhe integrimin e këtij shteti në strukturat Euro-Atlantike janë të konsiderueshme”. Më tej, gjenerali Bardhyl Kollçaku, shkruan: ,,Pjesë e rëndësishme dhe vitale e shtetit të Kosovës është edhe Forca e Sigurisë së Kosovës, e cila me shërbimin e saj ndaj qytetarëve të Republikës së Kosovës, ka arritur të krijojë besimin dhe krenari brenda vendit, ndërkohë që gëzon mbështetje ndërkombëtare gjithnjë e në rritje”.
Në fund, shefi i Shtabit të FA të Republikës së Shqipërisë, gjenerali Kollçaku shkruan: “Forcat e Armatosura të Republikës së Shqipërisë vlerësojnë jashtëzakonisht shumë rolin dhe kontributin e Forcave të Sigurisë së Kosovës në drejtim të forcimit të stabilitetit në rajon. FARSH do të vijojnë mbështetjen për FSK transformimin dhe integrimin sa më të shpejtë në strukturat Euro-Atlantike të sigurisë, si dhe të forcojë bashkëpunimin dypalësh në fusha të ndryshme ushtarake”.
