Adresim i kryetarit të Komunës së Vitisë në lidhje me situatën e krijuar me Koronavirus

13/04/2020 Institucionet

Adresim i kryetarit të Komunës së Vitisë në lidhje me situatën e krijuar me Koronavirus

Të nderuar qytetarë!

Komuna e Vitisë sot ka hyrë në muajin e dytë nën masën e izolimit, shkaku i Pandemisë me Covid-19. Kjo e keqe goditi së pari Vitinë, por fatkeqësisht u përhap edhe në pjesë tjera të vendit. Me të kuptuar se ne tashmë kishim rastet e para të të infektuarve në Kosovë, menjëherë ndërmorrëm masat e nevojshme, kurse dy ditë më herët kishim formuar Komitetin Komunal për Mbrojtje dhe Shpëtim. Që nga ai moment, për çdo ditë, në çdo formë dhe me krejt forcat, nuk jemi ndalur, por kemi qenë në shërbim të qytetarëve, duke u përpjekur që ta parandalojmë përhapjen e sëmundjes.

-Në koordinim me komponentën shëndetësore dhe të sigurisë, në bashkëpunim me institucionet, shoqatat, donatorët, këshillat e fshatrave, bashkësitë fetare dhe mekanizma tjerë, ne jemi të përkushtuar qind për qind që të jemi përkrahë jush në të gjitha aspektet. -Personelin shëndetësor, e vendosëm në gjendje gatishmërie, në vijën e parë të frontit. Kurse një pjesë, si masë parandaluese, e vetizoluam pasi kishte pasë kontakt me të infektuarin e parë. -Gjurmuam kontaktet e mundshme të rasteve të para me Covid-19 por identifikuam edhe rastet që kanë ardhur nga shtetet tjera. -Qëndruam në kontakt të vazhdueshëm me me institucionet qendrore për të bashkërenduar veprimet. Siguruam pajisje mbrojtëse si dorëza, maska, rroba mbrojtëse si dhe mjete dhe material harxhues medicinal. -Koordinuam dhe harmonizuam veprimet dhe aktivitetet me Policinë e Kosovës në funksion të zbatimit të masave dhe vendimeve të institucioneve qendrore për të parandaluar përhapjen e virusit. -Dërguam ekipet mjekësore për kontrolla mjekësore dhe funksionalizuam edhe dy punkte shëndetësore si dhe hapëm një punkt të ri. Por, trajtuam edhe pacientët tjerë me probleme kronike shëndetësore. -Mbajtëm në funksion shërbimet esenciale të administratës komunale dhe publike. Por vazhdimisht po dezinfektohen objektet dhe hapësirat publike si dhe po klorizohen dhe pastrohen rrugët dhe trotuaret. -Institucionet komunale, administrata, shërbimet publike dhe shërbimet tjera dhe drejtoritë përkatëse janë poashtu në ballë të përpjekjeve të përbashkëta për ta pêrmirësuar gjendjen. -Për shkak të kufizimit të qarkullimit, gjendja ekonomike është rënduar. Në këtë situatë shumë donatorë na dolën në ndihmë. Përmes tyre deri tani siguruam pajise mbrojtëse për stafin mjekësor, mbi 2000 pako ushqimore e higjienike dhe sasi e konsiderueshme e miellit dhe patates.

-Ne bashkërenduam veprimet dhe vendimet edhe me subjektet politike të Komunês së Vitisë, pa dallim. Kështu Kuvendi Komunal ndau 100 mijë euro nga buxheti komunal, për të mbështetur luftën kundër koronavirusit. -U koordinuam shumë mirë edhe me këshillat e fshatrave, si hallka të rëndësishme të zingjirit të punës sonë. Përmes tyre komunikuam me qytetarët dhe u harmonizuam për të shpërndarë të mirat materiale për familjet në nevojë. Poashtu në këtë drejtim punuam edhe me organizata e shoqata tjera si Kryqi i Kuq, Shoqata “Nëna Terezë”, etj.

Gjithashtu bashkëpunuam ngushtë me mediat për të pasqyruar gjendjen dhe për të përquar informata dhe mesazhe.

-Faleminderit të gjithëve: punëtorëve shëndetësorë, zyrtarëve policorë, punëtorëve teknikë, shërbyesve civilë, këshillave të fshatrave, diasporës vitiase, donatorëve, shoqatave e organizatave, punëtorëve të arsimit, individëve, subjekteve politike, mediave dhe të gjithë të tjerëve…për kontributin që po e jepni në funksion të përmirësimit të situatës. -Por, fatkeqësisht ditëve të fundit, rastet janë shtuar. Për më tepër, sipas profesionistëve, tani kemi hyrë në një fazë më të vështirë, prandaj duhet vëmendje dhe përkushtim më i madh. Jo vetem ne, kundër pandeminë po lufton e gjithë bota. Prandaj, bëhuni edhe ju pjesë e kêtyre përpjekjeve globale, sepse, më meritorët për fitoren kundër Koronavirusit jeni JU. Ndiqni udhëzimet e institucioneve dhe ekspertëve:

Rrini në shtëpi!

Mbajeni higjienën!

Mbani distancën!

Bashkë do t’ia dalim shpejt!

Me konsideratë, kryetari i Komunës së Vitisë

Sokol Haliti

Kontrolloni gjithashtu

Kryetari Haliti ka vizituar nga afër punimet në asfaltimin e rrugëve në fshatin Lubishtë

Kryetari i komunës së Vitisë, Sokol Haliti me bashkëpunëtor, ka vizituar sot fshatin Lubishtë të …

Radio Kosova e Lirë 94.2 FM
Kjo web faqe mirëmbahet nga Radio Kosova e Lirë. Materialet dhe informacionet të cilat janë pronë e radios Kosova e Lirë dhe redaksisë “Dëshmorët e UÇK-së” nuk mund të kopjohen, të shtypen, ose të përdoren në çfarëdo forme tjetër për qëllime përfitimi. Radio Kosova e Lirë mban të drejtat e rezervuara sipas dispozitave ligjore për të drejtat e autorit dhe pronës intelektuale. © Copyright 2005 - 2024, Të gjitha të drejtat e rezervuara