Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Dr. Fitim Selimi ka reaguar përmes një opinioni lidhur me qëndrimet e përfaqësuesve të Lidhja Demokratike e Kosovës rreth rezolutës për të burgosurit në Hagë, duke e cilësuar kushtëzimin e saj me hetimin e vrasjeve të pasluftës si akt politik kalkulues dhe jo parimor. Sipas Selimit, rezoluta ka një qëllim të qartë: garantimin e standardeve të drejtësisë, respektimin e të drejtave procedurale dhe monitorimin institucional të një procesi që mbetet politikisht e historikisht i ndjeshëm. Ai thekson se rezoluta nuk është instrument hetimor dhe as aktakuzë, ndërsa përzierja e saj me hetimet penale, sipas tij, cenon ndarjen e pushteteve. “Kur një parti politike e lidh një akt politik me veprime hetimore që janë detyrim kushtetues i organeve të ndjekjes penale, ajo më nuk kërkon drejtësi por ushtron presion për përfitime politike”, shkruan ai. Selimi rikujton se vrasjet e pasluftës janë plagë e rëndë që duhet të hetohet pa dallim, por kjo, sipas tij, është detyrë e Prokurorisë së Shtetit dhe jo monedhë këmbimi në debat parlamentar. Në opinionin e tij, ai nënvizon se përgjegjësia penale është individuale dhe paralajmëron se barazimi i luftës çlirimtare me kriminalitetin individual krijon hapësirë për narrativa që dëmtojnë shtetin. Në përfundim, Selimi thekson se drejtësia për vrasjet e pasluftës duhet të jetë normë institucionale, ndërsa mbështetja për standarde të drejta gjykimi për të akuzuarit në Hagë duhet të trajtohet si detyrim shtetëror dhe jo si pazar politik.
