Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Procesi i formimit të Qeverisë së re në Kosovë vazhdon të mbetet i pasigurt, ndërsa partitë politike nuk kanë arritur akoma marrëveshje koalicioni. Lëvizja Vetëvendosje ka përjashtuar bisedimet me Partinë Demokratike të Kosovës, ndërsa ka lënë mundësinë e bashkëpunimit me Lidhjen Demokratike të Kosovës. Publikisht, nuk ka tregues se një marrëveshje për Qeverinë e re është afër arritjes. Kryeministri në detyrë, Albin Kurti, ka sugjeruar së fundmi se nëse nuk arrin të formojë shumicën e nevojshme, alternativa mbetet shpallja e zgjedhjeve të reja. Sipas Kushtetutës, nëse përbërja e propozuar e Qeverisë nuk fiton shumicën e votave në Kuvend, presidenti ka të drejtë të emërojë një mandatar të dytë për kryeministër brenda dhjetë ditëve, që ka më shumë gjasa të formojë Qeverinë. Mandatari i ri do të ketë 15 ditë për të paraqitur përbërjen e Qeverisë dhe programin e punës së saj në Kuvend. Bazuar në vendimin e Gjykatës Kushtetuese nga viti 2020, ky mandatar mund të vijë edhe nga partia e dytë më e madhe, në këtë rast Partia Demokratike e Kosovës. Nëse Qeveria nuk formohet për herë të dytë, presidenti ka kompetencë të shpallë zgjedhje të reja, të cilat duhet të mbahen brenda 40 ditëve nga data e shpalljes. Deri atëherë, qeveria në detyrë vazhdon të ushtrojë detyrat e saj.
