Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Rreth gjashtë mijë protestues nga të gjitha trevat shqiptare pritet të marrin pjesë në protestën e paralajmëruar nga Organizata e Veteranëve të Luftës së UÇK-së, e cila do të mbahet më 16 nëntor në Strasburg, përballë Asamblesë së Përgjithshme të Këshillit të Evropës. Protesta organizohet kundër asaj që OVL-UÇK e konsideron padrejtësi ndaj ish-krerëve të UÇK-së të gjykuar në Hagë. Kryetari i OVL-UÇK-së, Hysni Gucati, ka deklaruar se përgatitjet janë drejt përfundimit dhe se koordinimi me mërgatën shqiptare në Evropë është bërë tashmë. Sipas tij, shumë qytetarë nga Kosova, Shqipëria dhe Maqedonia e Veriut kanë siguruar bileta të lira fluturimi për të udhëtuar drejt Bazelit e Shtutgardit, ndërsa mbi një mijë pjesëmarrës pritet të jenë vetëm nga Kosova. Gucati konfirmon se për shkak të kërkesës së madhe, disa kompani ajrore kanë rritur çmimet e biletave, ndërsa hotelet në Strasburg janë thuajse të gjitha të rezervuara nga qytetarët shqiptarë, të cilët janë detyruar të kërkojnë akomodim edhe në periferi dhe qytete përreth. Ai theksoi se organizatat e dala nga lufta nuk kanë marrë asnjë mbështetje financiare nga qeveria, duke shtuar se protestat e mëparshme në Holandë, Tiranë dhe Prishtinë janë realizuar falë donatorëve. Me thirrjen për drejtësi ndaj ish-krerëve të UÇK-së, protesta e Strasburgut mbahet në kohën kur po bëhen pesë vjet nga arrestimi i Hashim Thaçit, Kadri Veselit, Jakup Krasniqit dhe Rexhep Selimit. Gjyqi ndaj tyre, i cili nisi në vitin 2023, është drejt përfundimit, ndërsa të gjithë i mohojnë akuzat për krime lufte dhe krime kundër njerëzimit.
