Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Sistemi elektroenergjetik i Kosovës po përballet me një situatë alarmante dimërore, ku rritja drastike e konsumit dhe prodhimi i ulët vendor po e shtyjnë vendin drejt një krize serioze energjetike. KESCO ka pranuar publikisht se, për shkak të temperaturave të ulëta dhe përdorimit masiv të rrymës për ngrohje, kërkesa po tejkalon kapacitetet reale të furnizimit. Sipas njoftimit, importi i energjisë – që tashmë është jetik për mbajtjen në këmbë të sistemit, është bërë gjithnjë e më i vështirë për shkak të kufizimeve teknike dhe kushteve të tregut ndërkombëtar. Kjo e bën pothuajse të pamundur mbulimin e plotë të nevojave të qytetarëve në çdo moment. Megjithëse KESCO thotë se po shfrytëzon të gjitha opsionet, përfshirë kontratat afatgjata dhe blerjet në tregjet afatshkurtra, vetë institucioni pranon se në situata me kërkesë ekstreme “mbulimi i plotë paraqet vështirësi të mëdha” një sinjal i qartë se reduktimet e energjisë mbesin rrezik real. Në këtë kontekst, thirrja për kursim të energjisë nga ana e KESCO-s nuk është më këshillë, por domosdoshmëri emergjente. Qytetarëve u kërkohet të kufizojnë përdorimin, sidomos në orët e pikut, për të shmangur kolapsin e sistemit. Kjo situatë po nxjerr në pah brishtësinë e sektorit energjetik në Kosovë dhe mungesën e kapaciteteve të qëndrueshme prodhuese, duke ngritur pikëpyetje serioze mbi përgatitjen institucionale për përballimin e dimrave të ashpër dhe krizave të përsëritura energjetike.
