Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Komisioni Qendror i Zgjedhjeve ia ka dërguar edhe zyrtarisht kryetares Osmani shkresën, ku thuhet se nuk rekomandohet shtyrja e zgjedhjeve të jashtëzakonshme, të cilat janë caktuar të mbahen më 18 dhe 25 dhjetor 2022. Demokracia.com ka mësuar se presidentes Osmani tashmë i është vështirësuar vendimmarrja për pezullimin e zgjedhjeve, pasi që edhe ministri, Xhelal Sveçla ka dalë hapur me deklarata se mund të sigurohen kushte për mbajtjen e zgjedhjeve. Ndërsa, KQZ tashmë edhe zyrtarisht nuk e ka rekomanduar shtyrjen e tyre. Shtyrja e zgjedhjeve ose pezullimi i tyre pa rekomandim dhe kërkesë të institucioneve përgjegjëse për presidenten Osmani rrezikon ta çojë atë në Gjykatën Kushtetuese. Dihet tashmë se edhe ambasadorët e shteteve të Kuintit janë duke lobuar tek partitë opozitare që t’ia bëjnë më të lehtë vendimmarrjen për shtyrjen e zgjedhjeve në veri dhe të mos e çojnë rastin në Gjykatën Kushtetuese. Ishin deputetët e Lëvizjes Vetëvendosje, e cila tani udhëheq Qeverinë, të cilët më 22 qershor 2020 e kishin dërguar në Gjykatën Kushtetuese kërkesën për vlerësimin e kushtetutshmërisë së vendimeve të ish-kryetarit Hashim Thaçi për shtyrjen e zgjedhjeve të jashtëzakonshme për kryetar të Komunës së Besianës dhe të Komunës së Mitrovicës së Veriut për shkak të përhapjes së pandemisë.
