Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ish-kreu i Organizatës së Veteranëve të Luftës së UÇK-së, Nasim Haradinaj, ka vizituar në Hagë ish-presidentin e Kosovës, Hashim Thaçi, dhe ish-kryetarin e Kuvendit, Kadri Veseli, të cilët po mbahen në paraburgim tash e më shumë se pesë vjet. Haradinaj tha se i ka gjetur Thaçin dhe Veselin në gjendje shumë të mirë shpirtërore dhe mendore, pavarësisht izolimit të gjatë dhe mungesës së takimeve të shpeshta. Sipas tij, të dy udhëheqësit e dikurshëm të Kosovës shfaqin qetësi, vendosmëri dhe besim të palëkundur se e vërteta do të dalë në pah. Ata janë shumë të motivuar, të relaksuar dhe me një qëndrim të shëndetshëm mendor. E kanë marrë me qetësi këtë proces dhe e kuptojnë se duhet t’i përgjigjen të ashtuquajturës drejtësi, por janë optimistë se në fund do të ketë drejtësi dhe një aktgjykim lirues, u shpreh Haradinaj. Ai bëri të ditur se gjatë vizitës kishte realizuar edhe një gjest simbolik, të cilin e cilësoi si një mesazh që të mos harrohet nga të burgosurit, duke nënkuptuar ruajtjen e dinjitetit dhe kujtesës së luftës çlirimtare. Haradinaj theksoi po ashtu se vizita në paraburgimin e Hagës zhvillohet nën masa shumë të rrepta sigurie dhe kontrolli, duke e përshkruar regjimin e vizitave si tepër mbikëqyrës dhe kufizues. Megjithatë, ai tha se as këto rrethana nuk e kanë zbehur moralin e Thaçit dhe Veselit, të cilët, sipas tij, mbeten të bindur se drejtësia përfundimtare do të jetë në anën e tyre.
