Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Sot në Gjykatën Speciale, në Hagë është folur lidhur me inskenimin e vrasjes së gjashtë të rinjve serbë, në një kafene në Pejë, i njohur si rasti “Panda”. Për vrasjen e të rinjve serbë atë kohë ishin akuzuar shqiptarët. Lidhur me këtë rast është marrë në pyetje dëshmitarja, Sandra Mitchell, nga avokati i ish-kryetarit të Kosovës, Hashim Thaçi, Gregory Keohe. Ai e ka pyetur dëshmitaren nëse e dinte se operacioni me vrasje në “Panda” ishte një operacion i rrejshëm me motivin që ky krim t’i atribuohet UÇK-së. Incidenti në veçanti tërhoqi vëmendjen e ndërkombëtarëve më 14 dhjetor të vitit 1998. Kryerës të paidentifikuar kryen vrasjen e 6 serbëve të rinj të Kosovës në kafenenë ‘Panda’ në Pejë”, ka lexuar në raportin e OSBE-së, avokati Keohe, ndërsa dëshmitarja, Sandra Mitchell ka thënë se i kujtohet si incident. Ajo është përgjigjur se këto ishin vetëm pretendime, por pretendime të mirëbazuara që kërkonin hetim të mëtejshëm. Avokati ia ka kujtuar dëshmitares edhe deklaratën e politikanit serb, Vuk Drashkoviq, i cili i kishte thënë një gazete serbe se autoritetet e Serbisë me urdhër të Sllobodan Millosheviqit e kanë orkestruar këtë operacion. Dëshmitarja Mitchell ka mohuar të ketë njohuri për një gjë të tillë.
