Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Presidentja e Kosovës, Vjosa Osmani, ka vendosur t’ia japë mandatin për formimin e qeverisë Glauk Konjufcës, pas propozimit nga Lëvizja Vetëvendosje. Ky vendim, i marrë në një situatë të ndjeshme politike, po shihet nga një pjesë e opinionit si përpjekje për të zvarritur krizën dhe për t’i dhënë kohë shtesë partisë në pushtet. Në konferencën për shtyp, Osmani deklaroi se mandati i është dhënë në përputhje me Kushtetutën dhe se qëllimi i saj është shmangia e zgjedhjeve të reja. Ajo theksoi se Konjufca ka afat 15 ditë për të formuar qeverinë dhe për të siguruar shumicën prej 61 votash në Kuvend. Megjithatë, Vetëvendosja aktualisht nuk i ka numrat e nevojshëm për formimin e qeverisë, çka e bën këtë mandatim më shumë një veprim politik sesa institucional. Vendimi i presidentes Osmani ngre pikëpyetje serioze mbi paanshmërinë e saj institucionale. Në vend që të kërkojë një zgjidhje që përshpejton procesin demokratik, ajo ka zgjedhur një rrugë që mund të shtyjë krizën edhe më tej, duke i dhënë Vetëvendosjes kohë shtesë për manovrim politik. Në vend që të qartësojë rrugën drejt stabilitetit, ky mandatim e ka bërë edhe më të paqartë horizontin politik të vendit, duke lënë të hapur pyetjen thelbësore: a po zvarritet qëllimisht kriza për interesa partiake?
