Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Prokuroria e Specializuar në Hagë ka ngritur pikëpyetje mbi kredibilitetin e disa dëshmitarëve ndërkombëtarë që kanë dëshmuar në mbrojtje të ish-krerëve të UÇK-së në procesin gjyqësor në Dhomat e Specializuara. Sipas dosjes përfundimtare të dorëzuar në gjykatë, Zyra e Prokurorit të Specializuar i ka cilësuar ish-komandantin e NATO-s, Wesley Clark dhe ish-diplomatin amerikan James Rubin si dëshmitarë “të njëanshëm” dhe “të ndikuar”, duke pretenduar se ata kanë lidhje personale me ish-presidentin Hashim Thaçi. Këto vlerësime të Prokurorisë janë kundërshtuar nga njohës të së drejtës dhe avokatë të përfshirë në proces, të cilët i kanë cilësuar si përpjekje për të zbehur peshën e dëshmive të mbrojtjes. Sipas tyre, deklaratat e dëshmitarëve ndërkombëtarë janë në përputhje me rrethanat e luftës në Kosovë dhe me prova të tjera të paraqitura në gjykatë. Avokati i akredituar në Hagë, Artan Qerkini, ka deklaruar se këta dëshmitarë kanë pasur njohje të drejtpërdrejtë me zhvillimet e kohës dhe qasje në informacionet kryesore ndërkombëtare gjatë luftës. Ai ka ngritur dyshime se sulmet ndaj kredibilitetit të tyre synojnë të krijojnë një narrativë të njëanshme në proces. Procesi gjyqësor në Hagë vazhdon, ndërsa vlerësimi i kredibilitetit të dëshmitarëve mbetet një nga pikat kyçe të debatit mes palëve.
