Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Procesi i rinumërimit të votave nga zgjedhjet e parakohshme të 28 dhjetorit po ngadalëson formimin e institucioneve në Kosovë, duke krijuar pasiguri për miratimin e buxhetit dhe realizimin e projekteve të planifikuara për vitin 2026. Edhe pse Lëvizja Vetëvendosje ka fituar mbi 51% të votave, rinumërimet e deputetëve po vonojnë certifikimin përfundimtar të rezultatit të zgjedhjeve, hap ky vendimtar për konstituimin e Kuvendit dhe formimin e Qeverisë së re. Data e parashikuar nga KQZ-ja për shpalljen e rezultateve përfundimtare ishte 19 janari, por rinumërimet kanë shtyrë dukshëm këtë afat. Për të përshpejtuar procesin, Komisioni Qendror i Zgjedhjeve ka rritur numrin e komisionerëve në Qendrën e Numërimit të Votave, duke shtuar 10 tavolina të reja numërimi përveç 10 të mëparshme. Sipas zëdhënësit të KQZ-së, Valmir Elezi, procesi pritet të zgjasë 12-14 ditë. Instituti i Kosovës për Drejtësi paralajmëron se në këtë ritëm ka rrezik të shkelet afati kushtetues për zgjedhjen e Presidentit të vendit. “Gjasat janë që rezultatet të certifikohen rreth 10-15 shkurt. Në rastin më të keq, një rinumërim i plotë mund të shtyjë zgjedhjen e Presidentit, e cila sipas Kushtetutës duhet të bëhet jo më vonë se 5 mars,” tha Naim Jakaj nga IKD. Sipas Kushtetutës, Presidenti duhet të zgjidhet jo më vonë se 30 ditë para përfundimit të mandatit të presidentit aktual.
