Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ish-komandanti i Zonës Operative të Llapit, Rrustem Mustafa – Remi, ka vlerësuar lart rolin dhe trashëgiminë e Ushtrisë Çlirimtare të Kosovës, duke veçuar kontributin e udhëheqësve dhe luftëtarëve të saj gjatë periudhës së luftës. Në një shkrim të publikuar më 8 tetor, Mustafa ka theksuar se UÇK-ja, sipas tij, arriti të ruante pastërtinë morale dhe organizative, duke u mbrojtur nga ndikimet që ai i cilëson si infiltrim armiqësor në proceset vendimmarrëse. “UÇK-ja arriti të ruante pastërtinë e saj morale dhe organizative, duke u mbrojtur me kujdes nga çdo infiltrim armiqësor në procesin e vendimmarrjes”, ka shkruar Mustafa. Ai ka përmendur edhe vlerësimet e analistëve ndërkombëtarë për UÇK-në, të cilët, sipas tij, e kanë cilësuar atë ndër formacionet kryengritëse më të suksesshme në historinë moderne. Në shkrimin e tij, Mustafa ka vënë theks të veçantë edhe te figura e komandantit Zahir Pajaziti, duke e paraqitur atë si simbol të guximit dhe vendosmërisë së luftëtarëve të UÇK-së. “Komandanti Zahir Pajaziti qëndron si shembull i heroit që mposhti frikën për t’i dhënë guxim një kombi të tërë”, ka shkruar ai. Mustafa ka theksuar se udhëheqësit e UÇK-së, sipas tij, besuan deri në fund në fitoren dhe lirinë e Kosovës.
