Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Procesi zgjedhor në Kosovë po tronditet nga dyshime serioze për manipulim dhe vjedhje votash, pasi rinumërimi i një të tretës së vendvotimeve ka nxjerrë në pah mospërputhje alarmante – nga qindra deri në mijëra vota të devijuara për kandidatët brenda të njëjtave subjekte politike. Koordinatorja nacionale për zgjedhje, prokuroja Laura Pula, është takuar me zëvendësdrejtorin e përgjithshëm të Policisë së Kosovës, kolonel Fehmi Hoti, për të diskutuar fillimin e hetimeve paraprake lidhur me këto parregullsi serioze. Prokuroria ka bërë të ditur se Pula ka kërkuar nga kryeprokurorët e të gjitha prokurorive themelore që, në komunat ku ka përfunduar rinumërimi, të fillojnë menjëherë grumbullimin e informatave dhe sigurimin e provave që vërtetojnë kryerjen e veprave penale të ndërlidhura me procesin zgjedhor. Hetimet nuk do të mbesin në nivel lokal, por do të shtrihen në nivel vendi, çka tregon se përmasat e dyshimeve janë shumë më të mëdha sesa një “gabim teknik” i rastësishëm. Nga ana e tij, kolonel Fehmi Hoti ka deklaruar se Policia e Kosovës ka kapacitete të mjaftueshme dhe do t’u shërbejë kërkesave të prokurorëve të shtetit, por kjo nuk zbeh shqetësimin publik për dëmin që tashmë i është bërë besimit në zgjedhje. Nëse këto dyshime konfirmohen, vendi rrezikon të përballet me një nga skandalet më të rënda zgjedhore pas luftës, me pasoja të rënda politike dhe penale.
