Në kuadër të projektit “Fuqizimi i grave në tregun e punës”, i mbështetur nga Ambasada e Holandës në Kosovë dhe i implementuar nga Qendra Kosovare për Studime Gjinore (QKSG), në bashkëpunim me Zyrën për Barazi Gjinore të Komunës së Deçanit, u organizua një trajnim njëditor me pjesëmarrjen e grave si përfituese kryesore të projektit, si dhe të vajzave, djemve dhe burrave që janë në kërkim aktiv të punës.
Trajnimi u udhëhoq nga Lavdi Zymberi, ndërsa menaxhere e projektit ishte Etleva Zeneli.
Qëllimi i këtij aktiviteti ishte fuqizimi ekonomik i grave përmes ngritjes së kapaciteteve profesionale dhe zhvillimit të aftësive praktike, duke rritur mundësitë e tyre për qasje, punësim dhe integrim në tregun e punës. Njëkohësisht, aktiviteti promovoi barazinë e mundësive në punësim dhe pjesëmarrjen aktive të grave në jetën ekonomike.
Gjatë trajnimit u trajtuan tema me rëndësi për përgatitjen profesionale dhe punësimin, si:
* hartimi i një CV-je profesionale dhe i një letre motivuese;
* përgatitja për intervistat e punës;
* komunikimi profesional me punëdhënësit;
* prezantimi personal dhe zhvillimi i aftësive komunikuese;
* identifikimi i mundësive për punësim dhe avancim profesional.
Trajnimi u zhvillua me metodologji interaktive, duke përfshirë diskutime, ushtrime praktike, punë në grupe dhe shkëmbim përvojash. Kjo qasje u mundësoi pjesëmarrësve të identifikojnë sfidat me të cilat përballen gjatë kërkimit të punës dhe të përfitojnë njohuri e këshilla praktike për rritjen e mundësive të tyre për punësim.
Pjesëmarrësit treguan interesim dhe angazhim të lartë gjatë gjithë trajnimit, ndërsa njohuritë dhe aftësitë e fituara pritet të kontribuojnë në përgatitjen e tyre profesionale dhe integrimin më të suksesshëm në tregun e punës.
Ky aktivitet është pjesë e angazhimeve të vazhdueshme për promovimin e barazisë gjinore, fuqizimin ekonomik të grave dhe krijimin e mundësive të barabarta për punësim, duke kontribuar në zhvillimin ekonomik dhe social të Komunës së Deçanit.
Në përfundim të aktivitetit u shpreh mirënjohje për Ambasadën e Holandës në Kosovë për mbështetjen financiare të projektit, për Qendrën Kosovare për Studime Gjinore për implementimin dhe bashkëpunimin profesional, si dhe për trajneren Lavdi Zymberi dhe menaxheren e projektit Etleva Zeneli për kontributin e tyre në realizimin me sukses të trajnimit.
Zyra për Barazi Gjinore e Komunës së Deçanit mbetet e përkushtuar të vazhdojë bashkëpunimin me partnerët institucionalë dhe organizatat e shoqërisë civile në realizimin e iniciativave që promovojnë fuqizimin ekonomik të grave, rritjen e punësimit dhe krijimin e mundësive të barabarta për të gjithë qytetarët.
Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
