U mbajt tryeza “Sfidat në gazetari” në kuadër të “Javës së Lirisë së Shtypit”

10/05/2018 Institucionet

Në kuadër të Javës kushtuar lirisë së shtypit, në Viti është mbajtur tryeza me temën “Sfidat e gazetarisë”, nën organizim të Klubit të gazetarëve “Kerim Lewton” në Viti, në mbështetje të Institucioneve komunale dhe Rotari Club-Vitia. Gjithashtu është hapur një ekspozitë me fotografi të shkrimeve të gazetarëve që kanë raportuar në media të ndryshme, nga komuna e Vitisë. Në aktivitetet e sotme ishin të pranishëm edhe Ambasadori i Mbretërisë së Bashkuar Ruairi O’Connell, Ambasadori i Republikës së Shqipërisë në Kosovë Qemal Minxhozi, gazetarë e fotoreporterë të njohur Kosovar, udhëheqës të Rotari Club e mysafirë të tjerë. Fillimisht në orët e paradites, janë bërë homazhe tek monumenti i gazetarit të vrarë Kerim Lewton dhe janë vu kurora lulesh nga udhëheqës Institucional, së bashku me ambasadorin O’Connell dhe gazetarët, e më pas u inaugurua Zyra e gazetarëve në Shtëpinë e Kulturës “Gursel e Bajram Sylejmani”. Duke folur në cilësinë e nikoqirit të tryezës, kryetari i Klubit të gazetarëve “Kerim Lewton” në Viti Shyqeri Halabaku, theksoi se  Klubi i Gazetarëve  në Viti, që nga themelimi e deri më sot, manifeston Ditën e Lirisë së Shtypit, duke përkujtuar edhe  veprën e gazetarit , Kerim Lewton, i cili u vra në kryerje të detyrës, si reporter i Agjencisë së lajmeve AP, gjatë raportimit për luftimet në Maqedoni. “ Përgjatë këtyre viteve, gazetarët vitias kanë qenë të përkushtuar që të jenë  objektiv në ofrimin e informacioneve sa më reale dhe duke qenë afër  opinionit, për ngjarjet që kanë karakterizuar komunën tonë,  përkundër sfidave dhe kushteve jo edhe aq të volitshme për  punë, duke u shndërruar në  zëdhënës të qytetarëve për temat e ndryshme në aspektin social, kulturor, ekonomik dhe fusha të tjera” tha Halabaku. Ai po ashtu përmendi sfidat me të cilat ballafaqohen mediat në përgjithësi, si  vështirësitë  financiare,   mos miratimi i ligjit për sponsorizime,  censura dhe auto censura, mos respektimi i të drejtës autoriale, si dhe pasiguria e gazetarëve. “Megjithatë, ne shprehim falënderim për bashkëpunimin me organizatat dhe shoqatat e ndryshme që veprojnë në komunën e Vitisë, sikur edhe Institucionet komunale që sivjet i kanë mundësuar klubit tonë sigurimin e një zyre në Shtëpinë e Kulturës, bashkë me orenditë e duhura”, tha ai. Kurse kryetari i komunës së Vitisë Sokol Haliti, në fjalën e tij tha se Liria e shtypit dhe e shprehjes, janë të drejta themelore të njeriut, por aktualisht gjendja e medias në botë, sikur edhe profesioni i gazetarit, kanë qenë dhe mbesin në valën e problemeve të vazhdueshme  , sikur edhe në pikëpamje te rrezikshmërisë që përbën  gazetaria  si  profesion.   “Ne si institucione lokale, në vazhdimësi jemi angazhuar që të kemi raporte sa më të mira dhe komunikim të shëndoshë me mediat si ato lokale, po ashtu edhe ato qendrore, duke i kontribuar frymës demokratike dhe    duke qenë transparente dhe llogaridhënëse me mediat, të cilat janë në kërkim të informacionit.  Puna e gazetarit, respektivisht  mediave  në përgjithësi, do të vazhdoj të ketë rëndësi për ne, si dritare e parë e informacionit në një informim të drejtë, objektiv, duke u mbështetur në fakte dhe burime të sakta, në mënyrë që të ndikoj pozitivisht zhvillimeve në vend” ka thënë kryetari Haliti. Ndërkaq Ambasadori i Mbretërisë së Bashkuar Ruairi O’Connell, u shpreh se demokracia e një vendi mbrohet duke respektuar lirinë e gazetarëve. Çdo sulm ndaj gazetarëve, është sulm mbi demokracinë, andaj gjithë institucionet duhet të zotohen që ti kontribuojmë vendit duke i dhënë lirinë shtypit. Në tryezën me temë “Sfidat në Gazetari” , foli edhe ambasadori i Shqipërisë Qemal Minxhozi, i cili vlerësoj lartë aktivitetin e sotëm, por edhe morri si shembull të mirë Vitinë, për shënimin e Ditës së Lirisë së Shtypit. Ai më tej theksoi se liria e shtypit nuk dhurohet, por ajo fitohet me profesionalizëm, objektivitet dhe saktësi, duke kryer detyrat me përgjegjësi të lartë në luftimin e dukurive  negative në shoqëri. Me fjalë në tryezë u paraqitën edhe gazetari Fazli Veliu, reporter dhe kameramani i njohur Sylejman Kllokoqi dhe fotoreporteri Ilaz Bylykbashi. Në këtë aktivitet, u ndanë mirënjohje nga Klubi I gazetarëve “Kerim Lewton” për Ambasadorin Ruairi O’Connell, kryetarin e komunës Sokol Halitin dhe gazetarin dhe ish-korrespondentin Ibrahim Sefedini i cili momentalisht gjendet jashtë vendit. Me aktivitetin e sotëm është përmbyllur Java kushtuar lirisë së shtypit, e cila ka filluar një javë më parë, konkretisht më 3 maj në Ditën e Lirisë së shtypit.

Kontrolloni gjithashtu

Komuna e Deçanit po merr pjesë në Panairin e Turizmit dhe Sportit 2024 në Prishtinë

Komuna e Deçanit po merr pjesë në Panairin e Turizmit dhe Sportit 2024 në Prishtinë, …

Radio Kosova e Lirë 94.2 FM
Kjo web faqe mirëmbahet nga Radio Kosova e Lirë. Materialet dhe informacionet të cilat janë pronë e radios Kosova e Lirë dhe redaksisë “Dëshmorët e UÇK-së” nuk mund të kopjohen, të shtypen, ose të përdoren në çfarëdo forme tjetër për qëllime përfitimi. Radio Kosova e Lirë mban të drejtat e rezervuara sipas dispozitave ligjore për të drejtat e autorit dhe pronës intelektuale. © Copyright 2005 - 2024, Të gjitha të drejtat e rezervuara