Ish-ministri i Punëve të Brendshme, Xhelal Sveçla, ka pranuar se është ftuar nga Policia e Kosovës për t’u intervistuar në cilësinë e dëshmitarit lidhur me vizitën për të cilën, kryetari i Kosovës, Hashim Thaçi, akuzonte Sveçlën, asokohe Ministër i Brendshëm, pastaj Albin Kurtin dhe Haki Abazi ta kenë bërë në Dhomën e Përgjimeve në Telekom. Sveçla pranon se ka qenë vetëm një vizitë në Telekom me kërkesë të kryeshefes ekzekutive. Ka thënë se aty kishin marrë shqetësimet e saj dhe të drejtorit të Financave për gjendjen në ndërmarrje. “Ditën tjetër kam thirrur drejtorin e përgjithshëm të Policisë, drejtorin e Hetimeve dhe atë të Krimeve Ekonomike dhe kam kërkuar nga policia e Kosovës të merret seriozisht me këto shqetësime e t’i adresojë në rrugë ligjore.
Sot kam qenë në Drejtorinë e Krimeve Ekonomike dhe kam dhënë deklaratën time lidhur me këtë çështje. Më kanë ftuar në cilësinë e dëshmitarit edhe pse nuk e di si mund të kategorizohet kjo pas akuzës së presidentit, por normalisht kjo vetëm sa shpërfaq se si Prokuroria e Kosovës qenka shumë e vullnetshme të dëgjojë për shpifjet e presidentit e jo të merret realisht me kriminelët dhe krimet në Kosovë”, ka thënë Sveçla për mediet.