Përurohet objekti i banimit social në Stantërg të Mitrovicës

16/02/2018 Institucionet

Është përuruar objekti i banimit social në Stantërg të Mitrovicës i cili do të shërbejë për 17 familje me kushte të rënda sociale. Objekti është financuar nga Ministria e Punës dhe Mirëqenies Sociale dhe kap shumën prej 294 mijë euro, ndërkaq Komuna e Mitrovicës ka ndarë parcelën dhe do të bëjë shpërndarjen e këtyre banesave për 17 familje. Në ceremoninë e përurimit morën pjesë ministri i Punës dhe Mirëqenies Sociale, Skender Reçica, kryetari i Kuvendit të Republikës së Kosovës, Kadri Veseli si dhe kryetari i Komunës së Mitrovicës, Agim Bahtiri. Ministri i MPMS-së, Skender Reçica, tha se ndihet i lumtur që këto 17 familje përfituese nuk do të jenë më jashtë, por do të kenë një kulm mbi kokë dhe do të gjejnë sërish ngrohtësinë e shtëpisë, që iu ka munguar për shumë vite. Ministri tha se MPMS ka realizuar edhe projekte tjera të ndërtimit me karakter social, si ndërtimi i 10 shtëpive për familjet në nevojë në Podujevë dhe blloku i banimit për rastet sociale me 25 apartamente në Kaçanik dhe u zotua se brenda këtij mandati qeverisë, do të vazhdojë edhe me projekte tjera të tilla në mënyrë që të mos ketë më asnjë familje të pastrehë në Kosovë. Kryeparlamentari Veseli, u premtoi familjeve përfituese se 50 për qind të kuzhinave do t’ua mobilojë ai përmes donatorëve, ndërsa pjesën tjetër përmes institucioneve. Veseli tha se ky projekt është shumë i rëndësishëm sepse familjet kanë nevojë për strehim. Ai shtoi se nuk duhet të lejohet që familjet të jetojnë në kushte të vështira. Ndërkaq, Kryetari i Komunës së Mitrovicës, Agim Bahtiri falënderoi kryeparlamentarin Veseli dhe ministrin Reçica, të cilët mundësuan që në prag të 10 vjetorit të Pavarësisë së Kosovës  t’i gëzojnë këto familje me kushte të renda sociale. Po ashtu, kryetari Bahtiri tha se komuna ka formuar edhe komisionin adekuat që do të shqyrtojë kërkesat për strehim dhe se brenda dy jave, përfituesit do t’i marrin çelësat.

Kontrolloni gjithashtu

Filloi edhe një projekt i ri rrugor në komunën e Skenderajt

Filloi edhe një projekt i ri rrugor në komunën e Skenderajt, shumë i rëndësishëm për …

Radio Kosova e Lirë 94.2 FM
Kjo web faqe mirëmbahet nga Radio Kosova e Lirë. Materialet dhe informacionet të cilat janë pronë e radios Kosova e Lirë dhe redaksisë “Dëshmorët e UÇK-së” nuk mund të kopjohen, të shtypen, ose të përdoren në çfarëdo forme tjetër për qëllime përfitimi. Radio Kosova e Lirë mban të drejtat e rezervuara sipas dispozitave ligjore për të drejtat e autorit dhe pronës intelektuale. © Copyright 2005 - 2024, Të gjitha të drejtat e rezervuara