Pensionohet Luftëtari i dijes dhe lirisë, Sylejman Telaku

27/01/2025 Institucionet

Pas më shumë se 44 viteve pune të palodhur me ditar në dorë dhe pasion të pashtershëm për edukimin dhe arsimimin e nxënësve, të hënën me 27 janar 2025 u pensionua luftëtari i dijes dhe lirisë së Kosovës, Sylejman Telaku.

Në këtë ngjarje të veçantë arsimore dhe kombëtare për shkollën shqipe, për lirinë e Kosovës dhe për luftëtarin e dijes, morën pjesë dhe folën nënkryetari i Komunës së Malishevës, Vesel Krasniqi, si dhe drejtoresha për Arsim dhe Edukim, Arbëreshë Krasniqi.

Nënkryetari Krasniqi foli për kontributin e Sylejman Telakut si mësues dhe si bashkëluftëtar në radhët e para të UÇK-së, që nga fillimi i luftës deri në çlirimin e Kosovës. Ai theksoi se kjo vepër e mësuesit dhe luftëtarit është një shembull i veçantë në historinë tonë më të re. Ajo dëshmon se puna me nxënës është jetike për Kosovën e lirë, të pavarur dhe në rrugën e saj të shtetndërtimit dhe zhvillimit. Ndaj ndjehu krenar dhe i kompletuar, mësues dhe bashkëluftëtar, para familjes, kolegëve, bashkëvendësve dhe Kosovës, sepse e përmbushe me sukses misionin tënd të mësuesit dhe luftëtarit të lirisë.

Nga ana tjetër, drejtoresha për Arsim dhe Edukim, Arbëreshë Krasniqi, në fjalën e saj vlerësoi lart dy misionet e Sylejman Telakut:

“Ju, mësimdhënës Sylejman Telaku, patët dy misione madhore: misionin e mësuesit dhe misionin e luftëtarit për çlirimin dhe lirinë e shkollës shqipe dhe të Kosovës. Ju patët dy betime: betimin e mësuesit dhe betimin e ushtarit të UÇK-së. Sot, të dy këto misione dhe betime i përmbyllni me nder, para nxënësve, kombit dhe atdheut, ballëlartë dhe faqebardhë.”

Në këtë ceremoni të veçantë morën fjalën edhe drejtori i shkollës “Naim Frashëri”, Burim Begaj, si dhe ish-drejtorë, mësimdhënës dhe kolegë të Sylejman Telakut. Në fund, atij iu ndanë mirënjohje nga Drejtoria për Arsim dhe Edukim, kolektivi i shkollës, familja, miqtë dhe shokët, si një shenjë falënderimi dhe respekti për kontributin e tij të pashoq si mësues dhe luftëtar.

Kontrolloni gjithashtu

Përkujtohen Heronjtë e kombit Agim Selmanaj dhe Hajdar Agaj

Të enjtën kryetari i komunës së Deçanit, z. Bashkim Ramosaj i shoqëruar nga bashkëpuntorët e …

Radio Kosova e Lirë 94.2 FM
Kjo web faqe mirëmbahet nga Radio Kosova e Lirë. Materialet dhe informacionet të cilat janë pronë e radios Kosova e Lirë dhe redaksisë “Dëshmorët e UÇK-së” nuk mund të kopjohen, të shtypen, ose të përdoren në çfarëdo forme tjetër për qëllime përfitimi. Radio Kosova e Lirë mban të drejtat e rezervuara sipas dispozitave ligjore për të drejtat e autorit dhe pronës intelektuale. © Copyright 2005 - 2025, Të gjitha të drejtat e rezervuara