Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Zyra e Prokurorit të Specializuar ka dorëzuar aktakuzën e ndryshuar në çështjen penale ndaj Hashim Thaçit dhe katër të akuzuarve të tjerë – Bashkim Smakaj, Isni Kilaj, Fadil Fazliu dhe Hajredin Kuçi – duke shtuar një formë të re të përgjegjësisë penale ndaj Thaçit për “shtytje” në pengimin e administrimit të drejtësisë. Ndryshimet u reflektuan në pikat 1, 2 dhe 3 të aktakuzës, në përputhje me vendimin e fundit të Gjykatës së Apelit të Dhomave të Specializuara të Kosovës në Hagë. Vendimi i Apelit erdhi pasi pranoi pjesërisht ankesën e ZPS-së, duke konsideruar se Thaçi kishte shtyrë Fazliun, Smakajn dhe Kilajn për të penguar zyrtarët në kryerjen e detyrave të tyre, një vepër e dënueshme me burgim deri në pesë vjet. Kjo u bë e mundur përmes interpretimit të nenit 32(3) të Kodit Penal të Republikës së Kosovës, që sipas shumicës së Panelit të Apelit, është i aplikueshëm edhe për vepra me dënim deri në pesë vjet, në kundërshtim me qëndrimin e mëparshëm të gjyqtares së procedurës paraprake. Dosja pritet t’i kthehet gjyqtares së procedurës paraprake për shqyrtim të mëtejshëm mbi bazën e provave dhe elementeve të reja të paraqitura në këtë fazë të procesit.
