Ali Ahmeti mbron UÇK-në në prag të vendimit në Hagë: “Proces i padrejtë, por e vërteta do triumfojë”

Kryetari i Bashkimit Demokratik për Integrim Ali Ahmeti, ka deklaruar mbështetje të fuqishme për ish-drejtuesit e Ushtrisë Çlirimtare të Kosovës të cilët po gjykohen në Hagë për krime lufte dhe krime kundër njerëzimit. Ahmeti theksoi se beson në pafajësinë e tyre dhe në një përfundim triumfues të këtij procesi gjyqësor, të cilin ai e konsideron të padrejtë që nga fillimi. Sipas Ahmetit, UÇK-ja ka respektuar të gjitha normat dhe konventat ndërkombëtare gjatë luftës dhe gjykimi në Hagë është rezultat i një fushate të padrejtë, që fillon me raportin famëkeq të Dick Martit dhe të ashtuquajturën “Shtëpia e verdhë”. “Ishte një komprometim i madh, jo vetëm i Kosovës, por i tërë shqiptarëve,” tha Ahmeti, duke e konsideruar ngritjen e Gjykatës Speciale si një veprim që ka cenuar rëndë kauzën e luftës për liri. Ahmeti vuri në pah se figurat e UÇK-së që po gjykohen – Hashim Thaçi, Kadri Veseli, Rexhep Selimi dhe Jakup Krasniqi – janë të pazëvendësueshëm për të ardhmen e Kosovës dhe e konsideron të domosdoshme praninë e tyre në ndërtimin e shtetit. “Kosovës i duhet të gjithë luftëtarët, aq më shumë ata që kanë dhënë shumë për vendin,” përfundoi ai.