Edi Rama në hapje të Samitit: Jeni të rrethuar nga ëndrrat e fëmijëve shqiptarë për Evropën, jo nga makthet e saj

Kryeministri i Shqipërisë, Edi Rama, hapi sot punimet e Samitit të Komunitetit të Liderëve Evropianë në Tiranë me një fjalim simbolik dhe emocional, duke theksuar përkatësinë e shqiptarëve ndaj vizionit evropian. Në seancën plenare, Rama u shpreh se liderët evropianë nuk janë të rrethuar nga makthet e së kaluarës, por nga imagjinata dhe ëndrrat e fëmijëve shqiptarë për një të ardhme evropiane. “Ëndrrat e fëmijëve nuk mbahen peng nga mitet e të shkuarës,” tha ai, duke vënë theksin tek përkushtimi i Shqipërisë për një të ardhme të përbashkët në Evropë. Rama e cilësoi këtë samit si një moment domethënës, ku e kaluara po shihet përmes syve të së ardhmes. Ai nënvizoi edhe faktin se mbërritja e liderëve evropianë përkon me një fushatë ku “Evropa ka qenë më e pranishme se kurrë” dhe ku qytetarët votuan mbi 52% për vlera dhe përkatësi evropiane. Fjalimi i Ramës u prit me vëmendje në një ngjarje që shënon një nga momentet më të rëndësishme të diplomacisë rajonale dhe afrim të mëtejshëm të Ballkanit me familjen evropiane.