Kuvendi dështoi sërish të konstituohet, aktivizohet masa e përkohshme e Gjykatës Kushtetuese

Edhe përpjekja e fundit e deputetëve të legjislaturës së nëntë për ta konstituar Kuvendin e Kosovës ka dështuar, duke e zgjatur krizën institucionale. Seanca e 54-t konstituive, e mbajtur tetë orë pas asaj paraprake, përfundoi pa kuorum, pasi partitë opozitare nuk propozuan kandidatë për formimin e komisionit për votimin e fshehtë të kryetarit të Kuvendit.

Afati 30-ditor i përcaktuar nga Gjykata Kushtetuese për zgjedhjen e kryetarit dhe nënkryetarëve ka përfunduar, duke e pamundësuar çdo veprim të mëtejmë për konstituimin e Kuvendit. Në vendimin e saj të 24 korrikut, Gjykata ka vendosur një masë të përkohshme ex officio, e cila do të jetë në fuqi nga 27 korriku deri më 8 gusht. Kjo masë ndalon çdo vendim apo veprim të deputetëve të zgjedhur që lidhet me konstituimin e Kuvendit, për të shmangur “dëme të pariparueshme për rendin kushtetues dhe funksionimin e institucioneve të Kosovës”.

Kryetari i Nismës Socialdemokrate, Fatmir Limaj, konfirmoi një takim me presidenten Vjosa Osmani, por theksoi se nuk është arritur asnjë marrëveshje. Ndërkohë, Lëvizja Vetëvendosje deklaroi se u duhen vota, “por jo me çdo kusht”.

Pas seancës, kryetari i PDK-së, Memli Krasniqi, tha se Kosova ka mbetur pa institucione funksionale dhe se “qeveria e papërgjegjshme i ka mbyllur gojën jo vetëm institucioneve, por edhe aleatëve ndërkombëtarë”.

Me vendimin e Gjykatës Kushtetuese, deputetët nuk mund të ndërmarrin asnjë hap deri në afatin e përcaktuar, duke lënë pezull konstituimin e Kuvendit dhe nisjen e punës së institucioneve.