Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Shtetet e Bashkuara të Amerikës dhe Bashkimi Europian kanë përcjellë mesazhe të qarta në mbështetje të institucioneve të pavarura të Kosovës, duke theksuar rëndësinë e respektimit të Kushtetutës dhe integritetit zgjedhor. Drejtori për Evropën Perëndimore dhe Qendrore në Departamentin e Shtetit, Mark Fleming, zhvilloi një bisedë telefonike me kryetarin e Gjykatës Kushtetuese, Nexhmi Rexhepi. Në komunikatën zyrtare u bë e ditur se biseda u fokusua në rolin e Gjykatës në ruajtjen e sundimit të ligjit, ndërsa Rexhepi falënderoi SHBA-të për mbështetjen e vazhdueshme ndaj pavarësisë së këtij institucioni. Ndërkohë, ambasadori i Bashkimit Evropian në Kosovë, Aivo Orav, u takua me kryetarin e Panelit për Ankesa dhe Parashtresa të Zgjedhjeve, Zenel Leku, i cili kohët e fundit është bërë objekt i sulmeve politike pas rrëzimit të vendimit për mos-certifikimin e Listës Serbe në KQZ. Orav ritheksoi përkushtimin e BE-së për të mbështetur punën e pavarur dhe transparente të Panelit, pavarësisht presioneve politike. SHBA dhe BE kanë kohë që paralajmërojnë ekzekutivin në Prishtinë për ndërhyrjet në gjyqësor dhe për shkeljet e të drejtave të minoriteteve, sidomos në veri të vendit. Këto zhvillime po ndërlidhen gjithashtu me procesin e dialogut Kosovë–Serbi dhe po dëmtojnë reputacionin ndërkombëtar të Kosovës.
