Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryetari i Aleancës për Ardhmërinë e Kosovës, Ramush Haradinaj, është shprehur i kënaqur me rezultatin e zgjedhjeve lokale, duke theksuar se partia e tij ka shënuar rritje të votave në nivel vendi dhe ka fituar në të gjitha komunat që ka qeverisur deri më tani. Haradinaj ka përgëzuar kandidatët fitues të AAK-së dhe qytetarët për zgjedhje të lira e demokratike. “Urime të gjithë qytetarëve të vendit për zgjedhjet e lira e të mira që kanë ndodhur sot. I falënderoj të gjitha institucionet e vendit për punën që kanë bërë. Po ashtu, i bashkohem festës në Suharekë, ku po festojnë kolegët tanë. Qytetarët e Suharekës i përgëzoj për fitoren e tyre. Vërtet, kryetari Bali Muharremaj është një prej më të mirëve. I bashkohem festës në Rahovec, ku qytetarët i janë bashkuar kryetarit të tyre, Smajl Latifit. Po ashtu, festës në Gjakovë, ku Ardian Gjini ka arritur një fitore bindëse. Ky është një lajm i mirë për Gjakovën, sepse ai ka bërë një punë të mirë. Edhe në Klinë, kryetari Zenun Elezi ka fituar bindshëm. Deçani vazhdon të festojë që nga raundi i parë. AAK ka fituar të gjitha komunat që ka qeverisur me to,” ka deklaruar Haradinaj. Kreu i AAK-së ka theksuar se ky rezultat, përveç gëzimit, paraqet edhe një përgjegjësi të madhe për kryetarët e rinj. “Është një ndjenjë përgjegjësie. I lus kryetarët që të punojnë me përkushtim për qytetarët e tyre,” ka shtuar ai. Sipas Haradinajt, Aleanca ka dëshmuar një rritje të ndjeshme të mbështetjes në nivel kombëtar. “Kemi marrë mbi 87 mijë e 500 vota. E kemi rritur numrin dhe prezencën tonë. Në disa komuna do të qeverisim të vetëm, në disa të tjera do të bashkë qeverisim,” ka përfunduar Haradinaj.
