Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Tri herë brenda këtij viti Vetëvendosje inskenoi të njëjtin skenar politik: bllokimin e Listës Serbe në Komisionin Qendror të Zgjedhjeve, duke pretenduar se kjo parti kishte lidhje me sulmet terroriste në veri. Tri herë KQZ refuzoi certifikimin e saj, nën presionin e anëtarëve të VV-së që publiku ta besonte se Lista Serbe përbënte rrezik sigurie. Por, gjithë kjo retorikë u shemb brenda pak sekondave gjatë një interviste të Albin Kurtit në Kanal 10, ku ai, ndryshe nga eksponentët e partisë së tij, deklaroi qartë: “Lista Serbe është parti politike.” Me këtë frazë, Kurti relativizoi dhe zhbëri krejt narrativën që VV e kishte ndërtuar me muaj të tërë – nga Alban Krasniqi e deri te Sami Kurteshi, të cilët e quanin Listën Serbe “organizatë terroriste” dhe shfrytëzonin çdo dalje publike për propagandë të ashpër ndaj saj. Kjo kthesë e menjëhershme e Kryeministrit vjen në kohën kur aleatët ndërkombëtarë, përfshirë Ambasadën e SHBA-së dhe Zyrën e BE-së, e kanë kritikuar hapur VV-në për manovra populiste dhe politizim të procesit zgjedhor në KQZ. Madje, pezullimi i dialogut strategjik me SHBA-në erdhi pikërisht në periudhën kur Lista Serbe u la jashtë garës për herë të tretë. Ndërsa VV me muaj e ka shitur narrativën e rrezikshmërisë së Listës Serbe, tash Kurti minimizon rolin “destruktiv” të saj, duke lënë të kuptohet se bllokimet e mëparshme nuk kishin të bënin me siguri kombëtare, por me kalkulime politike të brendshme.
