Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Qindra miliona euro nga Bashkimi Evropian dhe Banka Botërore mbeten të bllokuara për Kosovën për shkak të vonesave politike dhe mungesës së konsensusit në Kuvend. Në vitin 2025, pa institucione të reja funksionale, Kosova nuk arriti të përfitonte 882 milionë euro nga Plani për Reforma dhe Rritje i BE-së dhe mbi 120 milionë euro nga tri marrëveshje të Bankës Botërore. Fondet, të destinuara për reforma ekonomike, mbështetje buxhetore, ndërtimin e çerdheve dhe sistemin shëndetësor, mbeten të papërdorura, ndërsa afati i disa prej tyre për hyrje në fuqi është 13 shkurt 2026. Ekspertët paralajmërojnë se vonesat tashmë kanë nisur të ndikojnë në nisjen e reformave dhe mund të shkaktojnë humbje të përhershme. Lëvizja Vetëvendosje, fituese e zgjedhjeve të 28 dhjetorit, pret bashkëpunim nga opozita për miratimin e marrëveshjeve ndërkombëtare, ndërsa LDK konfirmon gatishmërinë për t’i votuar. PDK dhe AAK nuk kanë dhënë deklarata të qarta, ndërsa vitin e kaluar disa marrëveshje nuk u votuan për shkak të mungesës së opozitës në seancë. Kjo situatë rrezikon jo vetëm shfrytëzimin e fondeve, por edhe besueshmërinë e Kosovës në arenën ndërkombëtare. Me një shumicë të thjeshtë në Kuvend, LVV-ja mund të ketë mundësi të miratojë fondet, por çdo vonesë politike mund ta detyrojë vendin drejt zgjedhjeve të reja dhe të humbasë një pjesë të konsiderueshme të miliardave euro të parashikuara për zhvillim dhe investime./REL/
